ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ បានបង្ហោះសារចូលរួមអបអរសាទរ ពិធីបុណ្យចូលឆ្នាំប្រពៃណីចិន និងបានក្រើនរម្លឹកឱ្យពលរដ្ឋដែលជាប់ខ្សែចិន វៀតណាម មានការប្រុងប្រយ័ត្នខ្ពស់ចំពោះគ្រោះថ្នាក់ចរាចរណ៍ និងអគ្គិភ័យ។

សម្ដេចតេជោ ហ៊ុន សែន បានសរសេរនៅលើហ្វេសបុកផេករបស់សម្ដេចនៅថ្ងៃទី២០ ខែមករា ឆ្នាំ២០២៣ នេះថា សូមឱ្យពលរដ្ឋមានការប្រុងប្រយ័ត្នខ្ពស់ ចំពោះការចម្អិនម្ហូបអាហារ ដុតក្រដាស់សែន ធូប និងទៀន ដើម្បីចៀសវាងកុំឲ្យមានអគ្គីភ័យកើតឡើង ដែលធ្វើឲ្យរំខានក្នុងថ្ងៃចូលឆ្នាំ ព្រោះតែការធ្វេសប្រហែស ខណៈពលរដ្ឋមួយចំនួនដែលធ្វើដំណើរទៅកាន់បណ្តាខេត្តផ្សេងៗ សូមបើកបរគោរពច្បាប់ចរាចរណ៍ កុំផឹកស្រវឹងក្នុងពេលបើកបរ ត្រូវមានការយោគយល់គ្នា និងប្រុងប្រយ័ត្នខ្ពស់ជានិច្ច ទោះបីបើកបរជិតឬឆ្ងាយ ដើម្បីសុវត្ថិភាពក្នុងថ្ងៃចូលឆ្នាំទាំងអស់គ្នា។

សម្ដេចសរសេរបន្ថែមថា៖ «សូមជូនពរបងប្អូនជនរួមជាតិជួបតែសំណាងល្អ ជោគជ័យ និងហេងហេងគ្រប់ៗគ្នាចាប់ពីឆ្នាំថ្មី២០២៣ នេះតទៅ»។

គួរឱ្យដឹងផងដែរថា កម្ពុជាបច្ចុប្បន្នជាមធ្យមគ្រោះថ្នាក់ចរាចរណ៍សម្លាប់មនុស្ស ៥នាក់ជារៀងរាល់ថ្ងៃ ដែលបង្ករជាការបារម្ភមួយរបស់រាជរដ្ឋាភិបាល ខណៈដើមឆ្នាំ២០២៣ នេះអគ្គិភ័យបានកើតឡើងគួរឱ្យកត់សម្គាល់ផងដែរ៕